.gif)
E ra vinakata na vei yunioni e na noda vanua me ra veitalanoa e liu kei na matanitu ni bera ni ra vakacegui e 5000 na tamata cakacaka vaka matanitu.
Namaki me na soli e dua na i lavo vei ira na varau vakacegui e tiko na nodra yabaki ni bula mai na 52 ki na 54.
Vakaraitaka o Rajeshwar Singh mai na nodra soqosoqo na tamata cakacaka vakamatanitu
ni sebera ni se tarogi madaga na nodratou nanuma e na i tuvatuva vou oqo.
“Au vabauta e na gauna oqo, e se i vakatutu walega ka sebera ni se vakadonuya na Paraiminisita ni noda vanua.
“Ia, dina ga ni sebera ni vakadonui, e levu e ra vinakata me kila se cava soti mada e na lavaki kina,” kaya ko Singh.
Kaya na vunivola liu ni nodra soqosoqo na qasenivuli i taukei Maika Namudu ni nuitaka ni rawa ni ratou na veitalanoa kei na matanitu e na i vakatutu vou oqo.
E na i matai ni Evereli ni yabaki oqo, e ra a vakacegui kina e rauta ni 2500 na tamata cakacaka vakamatanitu ni ra sa yacova na yabaki 55.
Kaya na i liuliu ni matabose ni cakacaka vakamatanitu Josefa Seruilagilagi ni sega ni yaga tale me ia na veitalanoa kei ira na soqosoqoni tamata cakacaka.
“Keitou na waraka ga na veivakadonui mai vua na Paraiminisita ni bera ni na vakayacori mai.”
Namaki me na lutu sobu tale na levu ni tamata cakacaka vakamatanitu e na Janueri ni yabaki mai oqo.
