.gif)
Sa vakatala na matabose ni veivakavaletaki (Housing Authority) na lewe ni tikotiko o Namara mai Tacirua, e ra tara vale tu vakaveitalia mai kea.
Vakaraitaka na gusu ni vosa ni matabose Arthur Hazelman ni sa lavaki tu na qele o’ya me na vakayacori kina e dua na veivakatorocaketaki vou.
Namaki me na dabe e kea e so na buloko ni vale vovou.
“Keitou namaka tiko me vakaoti na cakacaka e na loma ni tolu na vula mai oqo. Ia e na rawa sara vakavinaka na neitou sasaga kevaka e vakadonuya na baqe na Exim mai Jaina na neitou kerekere vakailavo,” e kaya ko Hazelman.
“E rauta ni 160 na vale e ra a tu e ke, ia sa vo wale saraga qo e 60.”
Namaki me ra na vakavaletaki e rauta ni 2000 na matavuvale ni na oti na veivakatorocaketaki oqo.
