Dei tiko na veiqaravi ni matanitu: Voreqe

April 14, 2009 03:57:50 PM

• A⁺ 
• A^-
• |
• 
• |
• 
• |
• 

Vakaraitaka ko Paraiminisita Komodoa Voreqe Bainimarama ni na sega ni dua na vakacaca e na kena ra qaravi na lewe ni vanua, dina ga ni sa bokoci na Yavu ni Vakavulewa ni 1997.

Kaya o Bainimarama ni na levu sara na veiveisau e na yaco tiko e na vica na siga mai oqo me rawa ni vinaka kina na noda vanua.

“E kerei me kua na ririko e na veiveisau oqo baleta ni nakiti ga me vakavinakataki na veiqaravi vaka matanitu vei ira ne lewe ni vanua.”

Kaya ni vaka ga ni liutaka tiko na noda matanitu ka liutaka na tabana ni veiqaravi vei ira na lewe ni vanua, e na saga me na liu tikoga na kena qaravi vakavinaka na vei tabana se so vei ira na lewe i Viti.

E vakadeitaka ko koya ni na saga me vakatoroicake taka na veiqaravi ni matanitu mai na vei korokoro kei ira e ra tu e na taudaku ni koro lelevu.

Qo e wili kina na tabana ni bula, vuli vei ira na luveda, kei na vakavinakataki ni gaunisala se na qaravi ni wai kei na livaliva.

Kaya tale o Bainimarama ni na vakaraitaki raraba tiko vei ira na lewe ni vanua na veisau e ra na varau yaco mai.

E tukuna na veika oqo ko Bainimarama ni oti na kena sogo e dai e vica na vale ni volavola lelevu me vaka na matabose ni qarava na nodra dodonu na lewe ni vanua (Fiji Human Rights Commission), liuliu ni tabana ni veibeitaki vakamatanitu (office of the Director of Public Prosecution) kei na vale ni volavola ni liuliu ni Reserve Bank.