.gif)
Era sa tekivu yaco yani ena keba ni mataivalu e Nabua na turaga i taukei ena noda vanua ka oka toka kina na turaga na Vunivalu mai Rewa Ro Epeli Mataitini.
Laurai na marau ena matadratou na vakalesilesi ni Tabana ni Veika Vakaitaukei mai nakeba ena nodra tiko ko Ro Epeli me vaka ni sa vakaraitaka raraba na Marama na Roko Tui Dreketi ko Ro Teimumu Kepa na nona sega ni vakaitavi ena bose siga rua ni Bose Ni Turaga ko Rewa kei Burebasaga.
Era yaco talega yani ena sigalevu edai na Turaga na Tui Ba ko Ratu Sakiusa Nagagavoka, na Tui Drola mai Yasawa ko Ratu Epeli Bogileka, kei na Tui Magodro mai na colo kei Ba.
Era tiko talega ko Ratu Joji Suveikama, na Vunivalu mai Viria, Naitasiri, ko Ratu Jo Nacola mai Ra, kei na Tui Nakasa mai Nakasaleka, Kadavu .
Vakaraitaka na gusu ni vosa ni Tabana ni Veika Vakaitaukei ko Kini Rarubi ni ra sa vakadeitaka na nodra na tiko ena bose e 14 na turaga ni vanua mai Tailevu, 12 mai Cakaudrove, ka ciwa mai Kadavu.
Kaya ko Rarubi ni ko Namosi taudua, mai vei ira na 14 na yasana, e sa vakaraitaka ni na sega ni tiko na nona mata ena Bose ni Turaga.
Ena tekivu tiko ena 10 na kaloko ena mataka na bose ni oti na veiqaraqaravi vakavanua.
Ena i matai ni siga ni bose, ena vakaraitaka tiko na matanitu tu vakawawa na nona ituvatuva me baleta na nona vakalesui tale na noda vanua kina veiliutaki vakademokarasi.
Ena i karua ni siga, ena nona gauna tiko ni Tabana ni Veika Vakaitaukei, ka ra na bulagoci tiko na turaga ena veika me baleta na tabana ni vuli mai Nadave, na Tabana ni Tovo kei na Vosa vaka-Viti, na Tabana ni Veitarogi Vanua, kei na so tale veiqaravi ena noda minisitiri.
Era na veisukayaki tiko na turaga ka vakaicili ena keba ena siga Vukelulu.
