Tarovi na tara ni otela e Nukulau

November 11, 2008 01:46:59 PM

• A⁺ 
• A^-
• |
• 
• |
• 
• |
• 

Sa mai tarovi tu e dua na veivakatorocaketaki e na yasana ko Rewa me dabe e dua na otela mai na yanuyanu ko Nukulau.

Tiko na kena i sau vakailavo e na $8 na milioni ka na toka vata e dua na vale ni bose, 200  na rumu ni vulagi, wavu, nodra vale na cakacaka e kea, vanua ni vakatakakana, rara ni qito, vale ni kana, vanua ni gunu, kei na vanua ni gade vei ira e ra via lai sarasara ga.

E na tiko talega e kea e dua na siteseni ni ovisa ka na rauta e 50 na tamata e ra vakacakacakataki e kea na gauna e na dola kina.

Vakabauti ni ra na rawa ka vakalevu mai na veivakatorocaketaki oqo na lewe ni vanua ni yasana ko Rewa, vakabiti na tikina e rua ko Vutia kei  Rewa.
 
E na vakatokai na otela me yacana na Nukulau Island Resort.

Vakaraitaka na vukevuke ni jemeni ni matabose ni yasana o Rewa Pita Tagicakiverata ni ratou sa vakayacora kece na ka e vinakata na minisitiri ni qele.

Sa solia tale tu ga na Gone Marama Bale na Roko Tui Dreketi, Ro Teimumu Kepa, na nona veivakalougataki.

“Sa solia na kena veivakadonui na minisita vakatawa ni qele (Netani Sukanaivalu) ia e ka ni rarawa ni mai tukuna na Paraiminisita Voreqe Bainimarama me se biu tu madaga va ya o Nukulau,” kaya ko Tagicakiverata.

“Ia keitou sega ni yalo lailai ka keitou na saga me keitou lai veitalanoa saraga kei na turaga Paraiminisita,” e kaya tale.

E nona tiko na matanitu na yanuyanu ko Nukulau ia e ra kena i taukei dina o ira na kai Vutia.

E a dau vakayagataka tu na matanitu ka a kerei mai vua na mataqali ko Naocodogo mai Vutia e na Janueri ni 1892.

Ia e na 1907, mani volitaki ko Nukulau ki na matanitu ka sega ni ra kila tu na lewe i Vutia se na lewe i Naocodogo.

Ia tekivu mai na 1991, e ra sa saga tiko ne lewe i Vutia me vakasukai tale mai vei ira na yanuyanu me vakayacori kina na veivakatorocaketaki.

Vakaraitaka ko Tagicakiverata ni vinakata na tikina me vakatorocaketaki talega na yanuyanu e rua ko Makuluva kei Laucala.