Yali e milioni, kere veivosoti na Tui Labasa

November 05, 2008 11:08:00 AM

• A⁺ 
• A^-
• |
• 
• |
• 
• |
• 

Sa kere veivosoti na Marama na Tui Labasa ko Adi Salanieta Tuilomaloma e na vuku ni kena vakayagataki vakatawayaga e rauta ni ono na milioni na dola e na kabani na Labasa Tikina Holdings.

E vakayacori na matanigasau vua na vanua e rua ko Qoibau kei Nagaceu mai Labasa, mai na koro ko Nasekula e na noa.

Vakaraitaka na nona matanivanua ko Ifereimi Talatu, ni ratou kere veivosoti tiko na matavuvale na Qomate ena vuku ni kena vakayagataki vakalialia na i lavo ni kabani, ka wili tiko kina e ruasagavulu na pasede ni nodra i lavo na 18 na yavusa e na tikina ko Labasa.

E dau taura tu na veiliutaki ni kabani na vuvale na Qomate tekivu mai na gauna e tauyavutaki kina e na 1998.

E na 1998, e a qai mai veiliutaki ko Mosese Bulitavu ka vakavuna me vakayacori e dua na veivaqaqai.

E na kena mai ciqomi na matanigasau, kaya na Taukei Qoibau Ratu Vilikesa Ranuinui ni kevaka madaga e vakayagataki vakatawayaga e milioni, sa nodra i tavi na lewe ni vanua me ra vosota na nodra marama.

Vakaraitaka ko Bulitavu e na nona rivote ni sivia na milioni na dola e vakayagataki vakatawayaga ka se yaco makawa tiko na veika oqo ni sivia e tini na yabaki sa oti.

Kaya ko Bulitavu ni sa ciqomi na matanigasau ni a vakadinadina taka na Tui Labasa na nona cala, ka mai dua talega na gaunisala me kauta vata tale mai na vanua ni oti na kena ceburaki tu na veika oqo.

“Dina ni sa mai vakayacori na kere veivosoti vakavanua, e na toso ga na veivaqaqai vaka ovisa,” kaya ko Bulitavu.

E a manidia liu tu ko Adi Salanieta e na Labasa Tikina Holdings mai na yabaki 2002 ki na 2005.