.gif)
Kaya na Paraiminisita vakatawa Voroeqe Bainimarama ni na sega ni vakasuka na veiliutaki ni noda vanua kevaka e sega ni ra vakavakarau na vei liuliu ni soqosoqo vakapolitiki me ra namata yani ki na bula vaka politiki vou.
E tukuna na vei ka oqo ko Bainimarama ki na FijiLive ni bera ni a lai liutaka na bose bibi oqo na mataka e dai.
Namaka tiko na i liuliu ni mataivalu me ra biuta laivi na i liuliu vaka politiki na ‘politiki makawa’ ka me ra cakacaka vata e na ruku ni Yavutu ni Veisau.
“Au sa nuitaka tiko ni ra gole mai ki na veivosaki oqo e na yalo ni via veisau. Me ra kauta mai ki na bose na nodra i vakatutu, sega ni veika e ra vinakata,” kaya ko Bainimarama.
Ia sa vakaraitaka oti ko Laisenia Qarase ni dua na nodratou kerekere, o ya me lesu ko Viti e na kena gauna totolo duadua ki na bula vakademokarisi.
“Keitou marautaka ni rawa ni keitou bau vakaitavi talega e na veivosaki bibi oqo ka keitou vakanuinui tu ni na dua na i tekitekivu vou vei Viti,” kaya ko Qarase.
Oqo me se qai matai ni nodra bose vata na i liuliu ni vei soqosoqo vaka politiki ni noda vanua kei Bainimarama ni oti na nona taura vakaukauwa na matanitu e na Tiseba ni 2006.
