.gif)
E rawa ni na taura na i tutu vaka Peresitedi ni noda vanua na Paraiminisita tu vaka wawa Voreqe Bainimarama kevaka e sega ni na digitaka na Bose Levu Vakaturaga e dua na i vukevuke nei Ratu Josefa Iloilo.
E rawa ni yaco na veika oqo kevaka e na kere vakacegu na turaga na Tui Vuda se kevaka e tauvimate vakasauri.
E na ruku ni noda Yavu ni Vakavulewa, e na taura tiko na i vukevuke ni Peresitedi na i tutu ni Peresitedi me yacova ni veidigitaki tale na Bose Levu Vakaturaga.
Ia e na gauna oqo e se sega tu ni macala na BLV me vaka ni sega tiko na veitokoni mai vei ira e lewe vuqa na yasana.
Sa vakaraitaka ko Bainimarama na macawa sa oti ni na sega ni bose na BLV kevaka e sega na veitokoni.
Kaya na loya ko Jon Apted ni kevaka e dua na ka e yaco vua na turaga na Tui Vuda, e na sega ni dua na Peresitedi.
Vakaraitaka talega e dua na kena dau, Brij Lal ni rawa ni taura ko Bainimarama na i tutu oqo me vaka ga na nona a tara e na gauna ni vuaviri e na i ka lima ni Tiseba, 2006.
Tukuna talega o Lal ni rawa ni cakava ga e dua na ka o Bainimarama me vaka ni liutaka tiko na matanitu e na gauna oqo.
