.gif)
E ratou sa bosea tiko na timi ni Bose Levu Vakaturaga (BLV), tauyavutaki me raica vakatabakidua na nodratou i tavi na matabose, na nona digitaki vakaikoya na Paraiminisita tu vakawawa ko Voreqe Bainimarama me jemeni ni BLV.
A vakadeitaka na i tukutuku oqo ko Ratu Josateki Nawalowalo, e dua ka lewena na timi ni BLV oya.
E namaki tale tiko ga me ratou na vakasavuya tiko mai e dua na i tukutuku e na cava ni siga e dai me baleta na macala ni bose.
“E kani kidacala sara ga vei keitou ni sa mai vaya na nona toso na minisita tu vakawawa me sa jemeni ni BLV,” kaya ko Nawalowalo.
“Keitou a sega sara ga ni namaka me vaka ni sega ni tautauvata kei na neitou vakatutu,” e kaya ko koya.
Tarogi ke dodonu vakalawa na nona digitaki, kaya ko Nawalowalo ni rawa ni digitaki koya vakaikoya ko Bainimarama me vaka ni vakaraitaki tu e na lawa ka vauci kina na veicakacaka e so ni tabana ni taukei.
Tarogi tale ga kevaka e tokona na timi ni BLV na veidigitaki oqo, vakaraitaka ko Nawalowalo ni sega ni dua na nodratou bisinisi e na tikina oya.
“Oqo e sega soti ni veitarotarogi ni keitou tokoni koya se sega. E sega sara ga na neitou bisinisi baleta keitou a vakacolati e na dua na i tavi ka keitou sa qarava oti. Na ka e ratou (matanitu tu vakawawa) sa vakayacora e ratou cakava tu e na dela ni nodratou vakatulewa sara ga,” kaya ko Nawalowalo.
Kuria ko Nawalowalo ni sa na yaga me na tarogi sara ga ko Bainimarama na vuna e a digitaki koya ga kina.
Ia, e vakaraitaka ko koya ni sega ni dodonu me taura na i tutu o ya ko Bainimarama me vaka ni tabu vakalawa me dua na lewenivanua e Viti me taura tiko e rua na i tutu vakamatanitu e na dua vata ga na gauna.
