Vakadeitaka na Paraiminisita ni noda vanua Voreqe Bainimarama vei vuravura ni na sega ni rai lesu ko Viti e na gaunisala e sa gole tiko kina na gauna oqo.

Vosa tiko o Bainimarama mai na vanua ni bose na Tradewinds e Lami ka tavoca kina e dua na i dusidusi vou, ka wili tiko kina e so na veisau lelevu.

Na i dusidusi vou oqo e namaki me na kauti keda yani ki na yabaki 2014, na gauna e namaki kina me na vakayacori na veidigidigi.

“E na vakayacori na veidigidigi nibera na Seviteba ni 2014,” e kaya ko Bainimarama vei ira na dau ni bisinisi kei na mata mai na vei vanua tani.

Kerea talega o Bainimarama vei ira na mata na nodra veitokoni e na sala e sa muria tiko qo o Viti.

E vakavinavinaka taka talega na nodra veivuke e na vuqa na veivakatorocaketaki e yaco tiko e na noda vanua.

“Tekivu yani qo me yacova yani na 2014, e na saga na matanitu me vakayacora na veisau me vinaka kina o Viti.”

Kaya ni na veisau lelevu oqo e na wili tiko kina e dua na Yavu ni Vakavulewa vou, kei na so na veisau e na lawa ni qele ka me rawa vei ira na i taukei ni qele me levu cake na rawai ka vakailavo.